Реакција на компанијата “ЕЛС – EКО ЛОГИСТИК СЕРВИС” за тендерот за транспорт на изборниот материјал од ДИК
Се избра “најповолен понудувач” на тендерот за доставување на избирачкиот изборен материјал, ни помалку ни повеќе на само неколку дена пред изборите. Цената која ја добива приватната пошта во загуба “Колпортер” по километар е пониска од транспортот на компири за релациите кои се наведени.
Доколку се земе во предвид еден транспорт на комбе на една релација Скопје-Битола, транспортот на најниската цена од логистичките компании е над 13.000 денари за транспорт на компири.
Транспортот за избирачкиот материјал за изборите чини 8.600 денари на истата релација. Тендерот вреден на над 100.000 евра, првпат беше објавен на бирото за јавни набавки од ДИК, а понудувачи беа Државната пошта и “Еко Логистик Сервис”. “Еко Логистик Сервис” е со пониска цена од државната пошта на повикот, но со образложение дека немале комплетна документација.
Оттука се јавува прашањето зошто од ДИК не побарале од “ЕЛС” во постапката да изврши дополнување на документацијата, туку им стигнало од ДИК дека поднесената документација е во ред?
Подоцна во поедноставена постапка од нигде-никаде се појавува “Колпортер”, фирма во загуба која ниту една банка неможе да им издаде банкарска гаранција, особено не за 2-3 дена. Вториот доказ кој излезе во јавноста е што “Колпортер” нема доволно возила како што има наведено во тендерската постапка.
Рекламниот материјал се вози со 15 возила, а во тендерската документација беа потребни 45 возила обезбедени со камери. Од “Еко ЛОГИСТИК Сервис” имаат доставено комплетна документација со регистарски таблички на возилата, камери, систем на ГПС, додека “Колпортер” користи возила од “Пост Експрес”.
Дали двете пошти имаат договор за соработка пред добивањето на тендерот од ДИК, или после тоа е склучен тој договор? Дали “Колпортер” доставил банкарска гаранција до ДИК?
Како ќе се мери/наплати цена по километар, кога возилата немаат ГПС системи? Кои се луѓето кои ги возат комбирања на “Колпортер”, бидејќи нема пријавено толку вработени?
На сите овие прашања треба да се испита дополнително целиот процес посочуваат од “Еко Логистик”. Единствено што сме сигурни е дека доколку се оди по закон, доколку прворангираниот понудувач не ги исполнува условите, постапката се доделува на второрангираниот најповолен понудувач.
Во денешно време со покачување на нафтените деривати оваа цена е целосно неисплатлива и е доказ за корупцијата која владее во нашето општество. Гласот на граѓаните вреди помалку од вреќа компири… – стои во реакцијата од оваа компанија испратена до нашата редакција.
