Чеченскиот лидер Рамзан Кадиров живее со дијагноза на некроза на панкреас повеќе од пет години, објави вчера независната информативна страница Новаја газета Европа, повикувајќи се на анонимни извори во московската претседателска болница, каде што наводно се лекувал Кадиров.
Неговата влошена состојба, наводно, го натера Кремљ да започне да работи на план за наследување за одржување на стабилноста во севернокавкаската република, пишува Новаја Газета. Според Новаја Газета Европа, лекарите првично му дијагностицирале на Кадиров акутна некроза на панкреасот – сериозна состојба што може да доведе до смрт – во јануари 2019 година.
Следниот месец, Кадиров со декрет објави дека накратко му ја отстапил власта на претседателот на регионалниот парламент „за период на привремена неспособност“, без да ја открие својата болест. Тој издаде друг декрет за краток трансфер на власта во јануари 2020 година.
Новаја газета Европа објави дека здравјето на Кадиров почнало брзо да се влошува во пролетта 2022 година, принудувајќи го да пропушти бројни телевизиски настапи.
Во септември 2023 година, Новаја Европа објави дека Кадиров бил хоспитализиран во елитната Централна клиничка болница во Москва околу еден месец со акутна белодробна инсуфициенција по предозирање со апчиња за спиење, за кои се вели дека му помогнале да се ублажат болките.
„Стариот водач повеќе нема да биде таму, болеста сериозно ќе го погоди. Дури и да се опорави сега, нема да биде ниту жив ниту мртов“, рекол извор близок за „Новаја Европа“.
Кремљ почна да работи на план за наследување во случај на смрт на Кадиров, според Новаја Европа.
Неколку часа по објавувањето на извештајот, каналот на Кадиров на апликацијата за пораки Телеграм сподели 4-минутно видео од чеченскиот лидер како разговара за улогата на неговиот регион во војната против Украина. Видеото вклучува снимки одблиску на Кадиров, кој не го движи телото и едвај се слуша како зборува.
