Палестинците ги посетуваат гробовите на најблиските убиени во војната во Газа и се молат покрај урнатините на џамијата и на уништените улици за време на Рамазан Бајрам, кој беше во голема сенка поради разорната војна.
Милиони муслимани ширум светот го слават Бајрам, одбележувајќи го крајот на постот Рамазан, со свечености, гозби и семејни собири, пишува Свисинфо.
Но, малкумина можат да најдат засолниште во Газа во ова посебно време за муслиманите. По шест месеци војна, нивниот фокус е на преживување на израелските воздушни напади, гранатирање, копнени офанзиви и хуманитарни кризи. Амани Мансур и нејзината мајка стојат покрај гробот на нејзиниот помлад син, потсетувајќи се на посреќните времиња. Таа вели дека минатиот Бајрам ѝ бил најубав во животот.
„Син ми беше покрај мене, во раце, го подготвував за празникот. Сѐ што сакаше, правев за него. Да беше тука со мене. Сабајлето ќе одеше во џамија и ќе ми кажеше. „Подготви ми подарок кога ќе се вратам“.
Во подобри времиња, луѓето како Махмуд ал-Хамајдех во јужниот град на Газа, Рафа, се собирале со семејството и пријателите на веселби и празнични оброци за време на празникот Бајрам.
„Ме боли помислата на минатогодишниот Бајрам. Ги гледам децата и ми се кине срцето. Седам со нив и почнувам да плачам, чувствувам тага за деновите што поминаа“, вели Хамајдех, која сега е во инвалидска количка откако беше ранет од израелската армија.
„Се сеќавам на минатиот Бајрам и се сеќавам на овој Бајрам. Минатиот Бајрам бев опкружен со моите деца и радосен. Но сега сум повреден, не можам да се движам или да одам никаде“, вели тој. Наместо тоа, тој ги поднесува израелските воздушни напади кои го претворија во урнатини и прашина голем дел од Газа, густо населена енклава со која владее Хамас.
Повеќето од 2,3 милиони луѓе во енклавата се бездомници. Болниците се уништени, лековите се дефицитарни, а многу жители на Газа се во опасност од глад. Израел соопшти дека ќе продолжи со воениот притисок додека не го уништи Хамас. Деца си играат во близина на урнатините на џамијата Ал Фарук во Рафа, што беше погодена во израелски напад.
Друг жител, Абу Шаер ги повика своите сограѓани муслимани да се обидат да извлечат сила од празникот Бајрам. „И покрај големото чувство на болка и фактот што ционистите нѐ убиваат непрекинато во последните шест месеци, ние мора да покажеме радост на овој ден“, вели тој.
На друго место на Блискиот Исток, каде што многумина живееле низ војна и секташко крвопролевање, муслиманите се молат за крај на војната. „Се обраќаме кон Бога за итно олеснување и победа за нашите браќа во Палестина“, рече Омар Низар Карим во Багдад, главниот град на Ирак.
„Ова е пораката што денеска ја испраќаме од ова благословено место до нашиот народ во Газа и нашиот народ во Палестина“, додаде Карим. Пропалестинските Јорданци се собраа во близина на израелската амбасада во Аман за да ја покажат својата солидарност со народот во Газа.
Пораката на денешниот протест е „Нема Бајрам додека Газа е уништена“, изјави Абдел Маџид Рантиси. „Нашиот Бајрам ќе биде на денот на победата на отпорот, победата на Газа“, вели тој.
