Силен земјотрес со јачина од 5,9 степени според Рихтеровата скала ја погоди централна Јапонија, соопшти Јапонската метеоролошка агенција (ЈМА). Нема опасност од цунами.
Три куќи се урнаа, но нема извештаи за загинати или повредени, соопшти Агенцијата за управување со пожари и катастрофи по плиткиот земјотрес што го погоди полуостровот Ното.
Јавниот радиодифузен сервис NHK прикажа снимка од најмалку една куќа која беше навалена со тешко оштетени ѕидови и урнат покрив со плочки.
Не се откриени аномалии во нуклеарните централи Кашивазаки-Карива и Шика во крајбрежниот регион на Јапонското Море, соопшти Јапонската нуклеарна регулаторна агенција.
„Регионот е сеизмички активен повеќе од три години, вклучувајќи го и земјотресот со јачина од 7,6 степени според Рихтеровата скала на 1 јануари оваа година. Ова се очекува да продолжи во догледна иднина, затоа ве молиме продолжете со претпазливост“, соопшти ЈМА.
Агенцијата предупреди и на лизгање на земјиштето и паѓање на карпи во регионот, особено по дожд или дополнителни земјотреси.
