Москва денеска го предупреди Западот дека рускиот одговор ќе биде многу остар доколку Соединетите Американски Држави и Европската унија запленат руски имот во вредност од стотици милијарди долари. По руската инвазија на Украина во 2022 година, САД и нивните сојузници забранија трансакции со руската централна банка и Министерството за финансии, блокирајќи околу 300 милијарди долари руски средства на Запад.
ЕУ усвои закон за користење на неочекуваните профити остварени од замрзнатите средства на руската централна банка, беше објавено вчера, што е прв конкретен чекор кон целта на Унијата да ги искористи парите за финансирање на обновата на Украина.
„Ова е кражба. Тоа е присвојување на нешто што не ви припаѓа“, изјави портпаролката на руското Министерство за надворешни работи Марија Захарова за радио „Спутник“, пренесува ТАСС. Захарова рече дека одговорот на Москва ќе биде „исклучително суров“ бидејќи Русија верува дека има работа со крадци.
„Со оглед на тоа што нашата земја го оквалификуваше како кражба, односот ќе биде како оној кон крадците“, рече Захарова. „Не политички манипулатори, не технолози кои претераа, туку крадци“, додаде таа.
Москва соопшти дека ако ѝ биде запленет имотот, ќе го заплени имотот на западните земји.
