Разрешени се сите дилеми во плејаут лигата од кошаркарскиот шампионат, откако Гостивар со денешниот триумф на гостувањето против Вардар и дефинитивно го избегна претпоследното место на табелата и обезбеди опстанок во елитното друштво.
Гостиварци одиграа одлична прва четвртина во која поведоа со 15-27 и го контролираа резултатот речиси до самиот крај. Вардар покажа карактер и израмни на 70-70 на две минути до крајот, но во нервозниот финиш подобро се снајдоа гостите, кои со три прецизно изведени слободни фрлања на крајот стигнаа до победата.
Митевски со 22 поени и 8 асистенции беше најзаслужен за оваа голема победа, Елис постигна 21 поен за Гостивар, додека најефикасни кај Вардар беа Бајрам со 17 и Марјановиќ со 13 поени.
Вардар со само една победа цела сезона (над Шкупи во плејаутот) од поодамна е испаднат од елитното друштво, а триумфот на Гостивар значи дека Шкупи е вториот клуб што летово ќе се пресели во понизок ранг на натпреварување.
