По шест години судење, случајот со трагичната несреќа кај Ласкарци во која загинаа 16 лица, а 38 други беа повредени доби судски правосилен епилог. Апелациониот суд денеска ја соопшти пресудата со која е прифатена жалбата на Обвинителството и ја зголеми казната на дел од осудените во првостепена постапка.
Казната за сопственикот на транспортната компанија „Дурмо Турс“, кој е и првообвинет во овој случај, е зголемена од 4 на 10 години затвор. На 10 години затвор е осуден и второобвинетиот Ремзи Мифтари, кој во првостепената постапка доби 6 години. На раководителот на техничкиот центар „АМЗ Гостивар“ кој беше третообвинет Игор Ѓорѓиевски, но и на контролорот како четвртообвинет Горан Дуковски, апелација им ги зголеми казните од 5 на 7 години.
Како што побараа од Обвинителството, казните не се променети за петтиот и шестиот осомничен, а тоа се техничкиот контролор Јане Бабаровски, кој во првостепената постапка беше осуден на 5 години затвор, како и возачот на автобусот кој беше осуден на 14 години затвор.
Пресудата е правосилна и осудените треба да бидат префрлени во затвор за да ја одлежат казната. Осудените имаат можност да поднесат барање за посебен правен лек до Врховниот суд.
Според пресудата, автобусот кој се преврте на 13.02.2019 година бил технички неисправен, а сите обвинети не ги почитувале законските обврски за безбедноста на патниците. Сопирачките не ги задоволувале минималните стандарди, а за да се избегнат казните на полициските органи, во автобусот бил поставен специјален тахографски манипулатор со цел да не се евидентира вистинската брзина на возилото. Од друга страна, возачот ја предизвикал незгодата како резултат на небрежност, движејќи се со поголема брзина од дозволената.
Во текот на јавната расправа во Апелација, сите обвинети, како што беше наведено пред првостепениот суд, изјавија дека не се чувствуваат виновни и не се согласуваат со пресудата, барајќи предметот да биде вратен на почеток поради суштински повреди на постапката, но и за погрешно утврдување на фактите. Сепак, ова беше неприфатливо за Обвинителството.
Ласкарци останува една од најтешките трагедии – покрај долгогодишната траума и болка, семејствата на жртвите, исто така, го понесоа товарот на бавната правда. Горан Давидовски во несреќата го загубил својот брат Зоран. Неговите зборови најдобро покажуваат колку им значеше правдата но и за недовербата која ја чувствуваа поради бројните одложувања.
