Читај.мк Читај и мисли слободно
Слични вести
Украинското Министерство за надворешни работи денеска ја обвини Русија дека незаконски постапува со украинските воени затвореници и ги користи за политички цели и побара хуман третман кон заробените странци кои се борат за Украина.
Министерството ја повика Русија строго да се придржува до одредбите на меѓународното хуманитарно право, вклучително и Женевските конвенции од 1949 година, кои ги дефинираат меѓународните правни стандарди за третман на затворениците.
„Украина го осудува незаконското однесување на Руската Федерација кон украинските воени затвореници, особено нивната употреба за политички цели“, соопшти украинското Министерство за надворешни работи.
„Бараме од руската страна строго да се придржува до одредбите на меѓународното хуманитарно право, особено Женевската конвенција за третман на воени затвореници и припадници на вооружените сили на Украина кои се воени заробеници.
Што велат за заробените странци во украинската армија?
Нагласено е и дека „сите странски државјани и лица без државјанство“ кои се борат на украинска територија на страната на украинските вооружени сили доброволно се примени на воена служба во согласност со украинскиот закон.
„Овие лица се припадници на вооружените сили на Украина, на кои, во согласност со одредбите на Женевската конвенција за заштита на воените жртви од 1949 година и Дополнителниот протокол I од 1977 година, се применува правниот статус на борците“, се вели во соопштението.
„Овој статус, меѓу другото, им дава право на таквите лица да бидат третирани како воени заробеници во случај да бидат заробени од припадници на непријателските воени сили.
Во јуни, сепаратистичкиот суд во источна Украина, поддржан од Русија, осуди на смрт еден Мароканец и двајца Британци. Две држави поднесоа жалба на пресудите.
Британски хуманитарец загина во руски притвор
Минатата недела, Британија изрази „длабока загриженост“ поради извештаите за смртта на британскиот хуманитарен работник додека бил во руски притвор во Украина.
Русија веднаш не одговори на изјавата на Министерството за надворешни работи.
Украина извести дека ги проверува сите податоци за третманот на воените заробеници и дека ќе ги истражи сите прекршувања и ќе преземе соодветни правни мерки.