недела, 24 јануари, 2021

Делчево го доби првиот музеј на олдтајмери

Делчево го доби првиот музеј на стари автомобили. Музејот е сопственост на делчевецот Лоренцо Трајановски кој истакна дека истиот располага со 17 олдтајмери кои се изложени во кругот на неговата вила над населбата Милково Брдо во Делчево.

-Од олдтајмерите кои ги имам најстара ми е оваа Фолксваген Буба, која неодамна е реставрирана. До неа има уште едно ретко возило Алфа „Суд“ и како што може да забележите овде има само ретки возила. Овде има 17 возила на број и сите се функционални. Имав и други возила, но имаше многу работа по нив и затоа се задржав само на овие возила, вели Трајановски.

Плановите на Трајановски се местото да добие и свој сопствен сервис за поправка на возилата како и изградба на летниковци каде посетители ќе можат да доаѓаат во посета н Музејот и притоа ќе имаат катче за одморање.

-Со моите колеги од здружението, имаме план на ова место да направиме еден мал мини сервис, за некои ситни поправки на возилата, додека околу објектот предвидена е и изградба на летниковци каде ќе може секој да дојде да ги види олдтајмерите и да ги повози ако сака, додава Трајановски. Во близина на Музејот се наоѓа неговиот насад со сина слива од која изработува домашна ракија со своја сопствена етикета.

-Тоа е долгогодишна наша традиција со која се занимаваме повеќе од 30 години, но претежно за домашна употреба, не продаваме за широка потрошувачка. Тука морам да ја пофалам мајка ми, која ја вари ракијата, имаме посебен казан за тоа. Етикетата ставаме чисто за нас и за пријатели кога подаруваме на некои наши роднини, додава Трајановски.

Освен што е вљубеник во олдтајмерите Трајановски долги години работи како пожарникар во делчевската Територијална противпожарна единица . Учествувал во многу акции за гаснење пожар, а многу пати ја има покажано и својата хуманост, реновирајки дел од опожарените објекти на луѓето бесплатно користејки го своето знаење од работа со гипс картон.

Извор: opserver.mk

Коментари

коментари

error: Content is protected !!